Yma Evertype ow nôtya bos dyllys lyver gans H. G. Wells, Gwerryans an Planettys, trailys gans Nicholas Williams. Delînyansow gans Mathew Staunton.
"Ny vynsa den vëth cresy in bledhydnyow dewetha an nawnjegves cansvledhen, y fedha an bës-ma whythrys yn sherp hag yn clos gans skentolethow brâssa ages skentolethow mebyon tus, saw mar vortal avellans aga honen... Saw dres an aswy vrâs a spâs, yth esa furneth o mar bell dhyworth agan furneth ny dell usy agan brës ny dhyworth brës an bestas mortal, furneth yeyn ha dybyta, ow meras orth an bës-ma dre lagasow envies, hag yn lent hag yn sur creaturs an furneth-na a borposyas aga thowlow wàr agan pydn."
Y feu Gwerryans an Planettys dyllys in Sowsnek rag an kensa prës i'n vledhen 1898. An lyver a yll bos consydrys an kensa whedhel adro dhe "woreskydnans dre vës-estrenyon", ha'y awedhyans wàr fuglien sciensek yw brâs dres ehen. An lyver re beu desedhys dhe'n radyo, dhe'n waryva ha dhe'n gwaya-mir, hag inspîrya hag awedhya a wrug lies ensampel a fuglien sciensek, in aga mesk jornals skethednek ha novelys grafek. Pàn vo va settys ryb Jyn an Termyn, An Den Dywel, hag Enys Doctour Moreau, yth hevel Gwerryans an Planettys moy kerys gans an bobel ès ken lyver vëth a screfas H. G. Wells. Hèm yw an kensa prësmay feu an novel-ma dyllys in Kernowek.
Pris £11.95. Dhe gafos dhyworth Amazon.co.uk. Rag godhvos moy, gweler evertype.com/books/wotw-kw.html
